|
Armenian Revolutionary Federation|Western U.S.A
|
||||||||||||||
|
|
Albert Ajemian's Visit to Los Angeles
ՃԱՐՏ. ԱԼԲԵՐՏ ԱՃԵՄԵԱՆԻ 15-ՕՐԵԱՅ ԱՅՑԵԼՈՒԹԵԱՆ Մարտի 26-ին 15-օրեայ աշխատանքային այցով Հայաստանից Գլենդէլի հայկական գաղթօջախ ժամանեց «Ալիք» օրաթերթի արտօնատէր, այզգային, հասարակական գործիչ՝ ճարտարապետ Ալբերտ Աճեմեանը իր տիկնոջ՝ Այդա Աճեմեանի հետ: Այցելութեան օրերին ճարտ. Աճեմեանը ունեցաւ բազմաթիւ հանդիպումներ ու ելոյթներ հայկական կազմակերպութիւններում ու միութիւններում, ինչպէս նաեւ հարցազրոյցներ՝ մամլոյ եւ հեռուստատեսութեան ներկայացուցիչների հետ: Ստորեւ ներկայացնում ենք սոյն հանդիպումների եւ միջոցառումների մանրամասնութիւնները:
Այցելութիւն ՔԱՀԱՄ-ի մրցախաղերին Ժամանման յաջորդ օրը՝ Կիրակի, Մարտի 27-ի երեկոյեան ժամը 4:30-ից 6:30-ը, ճարտ. Աճեմեանը ներկայ գտնուեց Գլենդէլի համայնքային քոլէջի մարզահամալիրում, ուր տեղի ունեցան ՀՄԸՄի 27րդ համադպրոցական ՔԱՀԱՄ-ի եզրափակիչ մարզախաղերը, որոնց մասնակցում էին լոսանջելոսահայ վարժարանների բազմաթիւ մարզիկ աշակերտներ: Խաղերի աւարտին կատարուեց մրցանակաբաշխութեան արարողութիւն:
հանդիպում՝ իրանահայ հայրենակցական միութիւնների վարչութիւնների հետ
Երեքշաբթի, Մարտի
29-ի երեկոյեան ժամը 7:00-ին, ՀՅԴ Կենտրոնական Կոմիտէի «Փէշէքէրեան» սրահում
ճարտ. Ալբերտ Աճեմեանը հանդիպում ունեցաւ Լոս Անջելոսի Իրանահայ միութեան,
«Նոր Ջուղայի Բարեկամներ» յանձնախմբի, Ուրմիոյ հայրենակցական միութեան
վարչութիւնների ներկայացուցիչների հետ: Հանդիպումը կազմակերպել էր
Կենտրոնական Կոմիտէի Հանրային Կապի յանձնախումբը: Միջոցառման բացումը կատարեց
Հանրային կապի գրասենեակի պատասխանատու՝ Սարօ Նազարեանը, որը ներկայացնելով
օրուայ հիւրին, ուրախութիւն յայտնեց, որ ճարտ. Ալբերտ Աճեմեանը Իրանում եւ
Հայաստանի անկախացումից ի վեր՝ հայրենիքում ծաւալած իր ազգային ու
հասարակական արգասաւոր գործունէութեան շնորհիւ արդէն իսկ ծանօթ դէմք է
հանդիսանում սրահում համախմբուած ներկաներին եւ ապա հրաւիրեց նրան՝
անդրադառնալու այն հիմնահարցերին, որոնք այսօր դիմագրաւում են թէ՛
իրանահայութիւնը եւ թէ՛ հայրենաբնակ ժողովուրդը:
հանդիպում՝ ՈՒՐՄԻՈՅ հայրենակցական միութԵԱՆ ԱՆԴԱՄՆԵՐԻ ՀԵՏ Երեքշաբթի, Ապրիլի 5-ի երեկոյեան ժամը 7:30-ին ճարտ. Ալբերտ Աճեմեանը այցելեց Գլենդէլում գործող Ուրմիոյ Հայրենակցական միութեան կենտրոնատեղի, ուր միութեան վարչութեան կողմից հազմակերպուած էր ողջոյնի եւ մեծարանքի միջոցառում՝ ճարտ. Աճեմեանի գաղութս կատարած այցի եւ մասնաւորաբար Իրանի երբեմնի հայաշատ Ուրմիոյ գաղթօջախում նրա ծաւալած ժողովրդանուէր գործունէութեան առիթով: Միջոցառման բացումը կատարեց միութեան վարչութեան փոխնախագահ՝ Բուլիկ Բաբայեանը, որից յետոյ Գասպար Սարգիսեանը ներկայացնելով օրուայ հիւրի կենսագրական գծերը, դրուատանքով անդրադարձաւ Ուրմիոյ շրջանում նրա կատարած ծառայութիւններին: Այնուհետեւ, որպէս երախտագիտութեան արտայայտութիւն, վարչութեան նախագահ՝Ռազմիկ Գիւլնազարեանը միութեան անունից ճարտ. Աճեմեանին յանձնեց շրջանակեալ յիշատակագիր եւ ապա բեմ հրաւիրուելով, նա նախ շնորհակալութիւն եւ ուրախութիւն յայտնեց ջերմ ընդունելութեան համար եւ գնահատանքով խօսեց իրանահայ կեանքում Ուրմիոյ հայութեան ունեցած ուշագրաւ դերակատարութեան եւ նուիրումի մասին: Նա նաեւ յոյս յայտնեց, որ Ուրմիոյ գաղթօջախից հազարաւոր մղոններով հեռու այս ափերում կայք հաստատած ուրմիացիները կը շարունակեն նոյն թափով ծառայել մեր ժողովրդին եւ իրենց գործուն մասնակցութիւնը բերել շրջանի ազգային, հասարակական աշխատանքներին: Նա պատասխանեց նաեւ իրանահայութեան եւ Հայաստանի ներկայիս իրավիճակին վերաբերող ներկաների բազմաբնոյթ հարցերին: Միջոցառման աւարտին տեղի ունեցաւ հիւրասիրութիւն:
ԸՆԴՈՒՆԵԼՈՒԹԻՒՆ ԼՈՍ ԱՆՋԵԼՈՍԻ ԻՐԱՆԱՀԱՅ ՄԻՈՒԹԵԱՆ ՆՈՐԱԿԱՌՈՅՑ ՇԷՆՔՈՒՄ Հինգշաբթի, Ապրիլի 7-ի երեկոյեան ժամը 7:30-ին ճարտ. Ալբերտ Աճեմեանն ու իր կինը Հանրային կապի յանձնախմբի անդամների ընկերակցութեամբ այցելեցին Լոս Անջելոսի Իրանահայ միութեան նորակառոյց շէնքը, ուր արժանացան միութեան կենտրոնական վարչութեան, խնամակալ մարմնի եւ միութեան անդամների ջերմ ընդունելութեանը: Միութեան սրահում տեղի ունեցաւ դասախօսական միջոցառում, որի բացումը կատարեց շրջանաւարտ կենտրոնական վարչութեան նախագահուհի Պերճուհի Ղեւեանը: Այնուհետեւ միջոցառման հանդիսավար իրաւաբան Արսէն Դանիէլեանը հակիրճօրէն ներկայացնելով ճարտ. Աճեմեանը կենսագրական գծերը, բեմ հրաւիրեց նրան ելոյթ ունենալու «հայ իրականութեան ներկայ մարտահրաւէրները» նիւթի շուրջը: Անդրադառնալով հայրենիքում տիրող քաղաքական, ընկերա-տնտեսական իրավիճակին, ինչը իր ծանր հետեւանքներն է ունենում հայրենաբնակ ժողովրդի նկատմամբ եւ պատճառ դառնում աշխատուժի եւ ընդհանրապէս հայ մարդու հեռացմանը՝ իր հայրենի բնօրրանից եւ ապրուստի որոնմանը՝ օտար ափերում ու հորիզոններում, բանախօսը հրամայական համարեց նորովի ծրագրաւոմամբ ու ռազմավարութեամբ զօրաշարժի ենթարկել ինչպէս հայրենիքի, այնպէս էլ սփիւռքի ողջախոհ շրջանակներին ու ուժերին՝ դիմակայելու համար հայութեան առջեւ ծառացած ներկայիս բախտորոշ ու կենսական մարտահրաւէները: Այդ իմաստով, նա մեծապէս կարեւորեց Հայաստան-Սփիւռք համագործակցութեան առաւել ամրապնդումը, ոչ թէ՛ անցեալի համահայկական զանազան խորհրդաժողովների ապարդիւն օրինակով, այլ՝ միանգամայն նորովի ու նպատակասլաց ուղղութիւններով ու ծրագրերով: Այնուհետեւ առիթ տրուեց ներկաներին հարցումներ ուղղելու ներկայացուած նիւթի մասին: Եղան նաեւ վերահաստատումներ բանախօսի վերլուծումների, մեկնաբանութիւնների եւ հիմնաւորումների կապակցութեամբ:
«ԱԼԻՔ» ՕՐԱԹԵՐԹԻ 80-ԱՄԵԱԿԻ ՀԱՆԴԻՍՈՒԹԻՒՆ
Ճարտ. Ալբերտ Աճեմեանի 15-օրեայ այցելութեան կիզակէտը հանդիսացաւ «Ալիք» օրաթերթի հիմնադրման 80-ամեակին նուիրուած հանդիսութիւնը, որը կազմակերպուել էր «Ասպարէզ» օրաթերթի խմբագրութեան, ՀՄԸՄ-ի Գլենդէլի «Արարատ» մասնաճիւղի վարչութեան համատեղ ջանքերով եւ Կենտրոնական Կոմիտէի Հանրայի կապի յանձնախմբի համագործակցութեամբ: Հանդիսութեանը, որը տեղի ունեցաւ Ապրիլի 8-ի երեկոյեան ժամը 8:00-ին «Արարատ» մասնաճիւղի հանդիսասրահում, ներկայ էին ԱՄՆ Արեւմտեան թեմի առաջնորդ՝ Գերշ. Տ. Մուշեղ Արքեպիսկոս Մարտիրոսեանը, ՀՅԴ Բիւրոյի անդամ՝ դոկտ. Վիգէն Յովսէփեանը, Կենտրոնական Կոմիտէի ներկայացուցիչ՝ Աւետիք Իզմիրլեանը եւ անդամներ եւ աւելի քան 450 ներկաներ ու հիւրեր: Միջոցառման բացումը կատարեց Կենտրոնական Կոմիտէի Հանրային կապի գրասենեակի պատասխանատու՝ Սարօ Նազարեանը, որը ողջունելով ներկաներին, նշեց, որ «Ալիք»-ը սոսկ թերթ ու խմբագրութիւն չի եղել իրանահայութեան համար, այն հանդիսացել է երիտասարդութեանը համախմբելու եւ ազգային գաղափարախօսութեամբ դաստիարակելու կարեւոր հաստատութիւն, որը ուշագրաւ դերակատարութիւն եւ ներդրում է ունեցել իրանահայ կեանքում: Այնուհետեւ նա բեմ հրաւիրեց «Ասպարէզ» օրաթերթի խմբագիր՝ Աբօ Պօղիկեանին եւ ՀՄԸՄ-ի Գլենդէլի «Արարատ» մասնաճիւղի ներկայացուցիչ՝ Ռուբիկ Գիւրջեանին, ովքեր «Ալիք» օրաթերթի հիմնադրման 80-ամեակին նուիրուած իրենց ուղերձներում բարձրօրէն դրուատեցին «Ալիք» օրաթերթի եւ թերթի շուրջը համախմբուած մտաւորականներին, որոնց անանձնական նուիրումով 80 տարի շարունակ «Ալիք»-ը մնաց եւ շարունակում է մնալ պատնէշի վրայ, նոր վերելքներ արձանագրելով իրանահայ մամուլի պատմութիւնում: Սրտի խօսքով հանդէս եկաւ իրանահայ կեանքում ազգային, հասարակական ու քաղաքական անգնահատելի վաստակ ունեցած, «Ալիք»-ին տարիներ շարունակ իր մտաւոր ծառայութիւնը մատուցած Սեպուհ Յովհաննիսեանը, որը համափարպակ կերպով ներկայացրեց «Ալիք»-ի դերն ու նշանակութիւնը ո՛չ միայն իրանահայ, այլ համասփիւռքեան մակարդակով եւ գնահատանքի խոր զգացումով յիշատակեց թերթի բոլոր խմբագիրների ու արտօնատէրերի անունները, շեշտելով, որ նրանց անսակարկ ծառայութեան շնորհիւ «Ալիք»-ը յաջողեց նուաճումներ արձանագել հայ մամուլի անդաստանում: Միջոցառմանը ցուցադրուեց «Ալիք»-ի նորակառոյց շէնքին ու թերթի խմբագրութեանը նուիրուած բովանդակալից տեսաներիզ, որը նկարահանուել էր Յովան Թաշճեանի Թեհրան կատարած այցի օրերին: Այնուհետեւ բեմ հրաւիրուեց օրուայ գլխաւոր բանախօս, «Ալիք» օրաթերթի արտօնատէր Ալբերտ Աճեմեանը, որն հանգամանօրէն անդրադարձաւ «Ալիք»-ի առաքելութեանը, շեշտելով, որ թերթի մշտապէս առաջնորդուել է անկողմնակալ լրատուութեան աղբիւր հանդիսանալու սկզբունքով եւ իր որդեգրած ազգային գաղափարախօսութեամբ արժանացել է համայն իրանահայութեան բարձր գնահատանքին ու յարգանքին: Նա նաեւ ուրախութիւն եւ շնորհակալութիւն յայտնեց բոլոր ներկաներին, որ հազարաւոր մղոններով հեռու Գլենդէլ քաղաքում իրենց խուռներամ ներկայութեամբ պատշաճօրէն նշեցին «Ալիք»-ի տարեդարձը: Գեղարուեստական ծրագրով հանդէս եկաւ «Արարատ» մասնաճիւղի երգչախումբը, որից յետոյ օրհնութեան ու գնահատանքի եզրափակիչ խօսք ասաց առաջնորդ Սրբազան Հայրը: Հանդիսութեան աւարտին սրահ բերուեց «Ալիք» օրաթերթի անունը կրող եւ մոմերով զարդարուած տարեդարձի կարկանդակը, որը հատուեց օրուայ հիւրերի ձեռամբ: Ներկաները հիւրասիրուեցին տարեդարձի կարկանդակով ու շամպայնով: Միջոցառումը աւարտուեց երեկոյեան ժամը 10:00-ին:
ԱՅԼ ԱՅՑԵԼՈՒԹԻՒՆ
Լոս Անջելոս կատարած իր 15-օրեայ այցի ընթացքում, ճարտ. Աճեմեանը ունեցաւ նաեւ բազմաթիւ այլ հանդիպումներ եւ հարցազրոյցներ՝ լոսանջելոսահայ շրջանակների ու հեռուստակայանների հետ: Նա նաեւ այցելեց Արեւմտեան Թեմի Ազգային Առաջնորդարան, ուր ընդունուեց Թեմակալ Առաջորդ Մուշեղ Արք. Մարտիրոսեանի կողմից: Իսկ Մարտի 30-ին, Ապրիլի 5-ին եւ 7-ին այցելեց Էնսինոյի «Ֆերրահեան», Հոլիվուդի «Ալէք Փիլիպոս» եւ Գլենդէլի «Շամլեան» ազգային վարժարանները, ուր հանդիպումներ ունեցաւ տնօրէնների, ուսուցչական կազմերի եւ աշակերտութեան հետ: Մեկնումից մի գիշեր առաջ, Ապրիլի 10 երեկոյեան, ճարտ. Աճեմեանը իր տիկնոջ՝ Այդայի հետ ներկայ գտնուեց Բըրբանք քաղաքի նորակառոյց հայ կենտրոնի օգտին կազմակերպուած ճաշկերոյթ-հաւաքին:
Այս լուրերը տրամադրւում են ՀՅԴ Արեւմտեան Ամերիկայի Կեդրոնական Կոմիտէի Հանրային Կապի Գրասենեակի կողմից ARF Central Committee Office of Public Relations Contact Person: Saro Nazarian Tel: (818) 243-7059 Fax: (818) 243-1467
********************************************************
|
|||||||||||||
